《炸雞控必食之選》
一向對韓式炸雞情有獨鐘，雖然炸雞啤酒熱潮已經冇“星星”時期咁被受吹捧，但咁都無損我對炸雞嘅熱愛。試過多間韓式炸雞店後，今日終於有機會黎到Goobne Chicken（旺角店）滿足我嘅炸雞癮。
蜜糖咖哩烤雞 ($168)
烤雞外脆內軟，肉質又滑又多汁，唔會烤到好乾。蜜糖嘅甜味同辛辣嘅咖哩醬好夾，又入味，但有啲鹹，所以一定要叫野飲。
芝士烤雞串 ($168)
雞塊大蔥串燒，雞塊肉質嫩滑，外層塗咗甜甜酸酸嘅韓式醬料，有啲辣，但係可接受嘅程度。
大蔥好有嚼勁，一路𡁻醬汁味一路湧出，但食到尾可能會有渣。串燒沾上半溶嘅香濃芝士，仲可以拉絲，雖然充滿罪惡感，但一於少理！
韓式炒粉絲雞蛋卷 ($148)
韓式芝士雞蛋卷就食得多，用炒粉絲做餡料都係第一次試。一啖可以食到粉絲嘅煙韌、醃蘿蔔嘅爽脆、蛋香、芝士同火腿嘅鹹香，加上少少茄汁同芥末，味道同口感都充滿層次。每件蛋卷都好足料，真係想encore!
Shark Special ($78)
食炸雞梗係要飲返杯冰凍飲品，但又唔想飲啤酒，所以叫咗non-alcohol嘅shark drink，鐘意飲酒嘅你亦可以叫alcohol version。
第一啖飲到好重青檸味，慢慢飲多兩啖發覺味道好似能得利黑加倫子軟糖隻味，甜甜酸酸，好refreshing，加上佢係沙冰，所以超級解渴，仲要好大杯，飲極都飲唔完，可以兩個人share（鯊魚只係裝飾喔）。
________________________________________________
地點：旺角瓊華中心15/F
營業時間：星期一至日 1200-0200
Search